Dagskrá námskeiðs í Dalahöllinni 4.-5.febrúar 2012

Allir hestamenn hvattir til að mæta og bæta við sig fróðleik 

 Ath... breytingar skal tilkynna til Helgu Rósu 8654247

·        Æskilegt er að allir séu búnir að hita upp hrossið fyrir tímann og komin inn á gólf 5 mín fyrir sinn tíma og vera tilbúnir þegar kemur að þeim. 

·        Sýnikennslan byrjar kl 13:00 og gott er að vera komin tímanlega.

·        Það má koma hvenær sem er dags og fylgjast með tímum.

·        Taka skal tillit til þeirra sem eru í tímum

·        Kaffi og bakkelsi verður á boðstólnum.

Kl 20:30 á laugardagskvöldið verður Videokvöld í félagshúsinu

Allir velkomnir 

Hestadagar í Reykjavík

Hestadagar í Reykjavík er samvinnuverkefni LH, Höfuðborgarstofu, Íslandsstofu, Icelandair Group og hestamannafélaganna á stórhöfuðborgarsvæðinu og verða haldnir dagana 29. mars - 1. apríl næstkomandi. 

Dagskráin verður með fjölbreyttu sniði þetta árið. Fimmtudag og föstudag verður farið í   reiðtúra, borðuð kjötsúpa, horft á tískusýningu, hrossaræktarbú heimsótt og horft á flotta gæðinga á lokakvöldi Meistaradeildar í hestaíþróttum í Ölfushöll.

Eins og í fyrra verður farin skrúðreið á laugardeginum 31. mars og að þessu sinni verður farinn hringur í miðbænum.  Í ráðhúsi Reykjavíkur verður eitthvað hestatengt í boði allan daginn, söngur, fræðsla og gaman.   Um kvöldið endum við svo á að horfa á flottustu töltara landsins á skautasvellinu í Laugardal: "Ístölt - þeir allra sterkustu".

Sunnudagurinn er tileinkaður æskunni.  Sýningin Æskan og hesturinn er fjölskylduhátíð í Reiðhöllinni í Víðidal sem öll hestamannafélögin á stórhöfuðborgarsvæðinu standa að. Haldnar verða tvær sýningar á sunnudeginum 1.apríl.  Sýning þessi hefur alltaf verið gríðarlega vinsæl og þar má sjá framtíðarknapa Íslands leika listir sínar með fákum sínum.

Endanleg dagskrá og nánari upplýsingar um Hestadaga í Reykjavík verður birt á næstu dögum inni á www.icelandichorsefestival.is

Viðburður sem engin áhugamaður um íslenska hestinn ætti að missa af!

Kæru félagsmenn

Ásvaldur hefur látið vinna teikningar og kostnaðaráætlanir að tveimur hesthúsum við Dalahöllina eftir sínum hugmyndum. Þær er hægt að skoða ef þið veljið "Teikningar frá Ása" í valmyndinni efst á síðunni.

Kæru félagar
 
Þá er komið að síðasta reiðtúr ársins - gamlársreiðinni okkar. Lagt verður af stað frá Skálateigi þann 31.12 klukkan 14 og riðið út sveitina að félagshesthúsunum, þar sem formaðurinn og frú bjóða í kaffi.

Sjáumst hress  

Útreiðanefnd

GLEÐILEGA HÁTÍÐ ÖLL SÖMUL 
Vonandi hafa allir það afar gott við át, afslöppun og útreiðar á nýjárnuðum gæðingum. Hér er grein með ráðleggingum sem gott er að hafa í huga um áramót.

Því miður hefur það stundum brugðið við, að slys eða óhöpp hafa orðið í kringum áramótin vegna ofsahræðslu dýra við flugelda. Hræðsla og óróleiki eru eðlileg viðbrögð hjá dýrum, sem vita ekki að það er ekki um náttúruhamfarir að ræða þegar himininn lýsist upp af háværum flugeldum! Það er í eðli dýra að hræðast hávaða, reyk og eld og eigendum þeirra ber skylda til að passa upp á dýrin sín til þess að þau verði ekki sjálfum sér eða öðrum að voða.

Það eru nokkur atriði sem hesteigendur verða að hafa í huga þegar gamlárskvöld nálgast.

• Hafa varann á við útreiðar í þéttbýli í kringum áramótin. Við þekkjum dæmi þess að slys hafi orðið þegar hross fælast við leiftur eða hávaða frá flugeldum. Þar að auki getur hrossið valdið meiri skaða þegar það rýkur út í buskann, sturlað af hræðslu.
• Á gamlárskvöld er gott er að byrgja glugga hesthúsa ef hægt er, hafa ljósin kveikt og útvarpið á. Þetta minnkar áhrifin af hávaða og ljósglömpum frá flugeldum.
• Það er öllu snúnara með hross á útigangi. Mikilvægt er að þeim sé gefið vel á gamlársdag, áður en lætin byrja og dimmt verður. Best er að hafa þau á svæðum sem þau þekkja vel til að reyna að fyrirbyggja að þau fari sér að voða.
• Sumir bændur reka hrossin í aðhald, gerði eða annað, hafa traktor eða bíl í gangi með ljósin á og lýsa að hrossahópnum. Þetta hefur gefist vel, því hrossin heyra druninn í traktornum og ljósin dempa leiftrin frá flugeldunum. Við verðum að forða því að hrossin æði af stað, gegnum girðingar jafnvel, því það hafa jú orðið banaslys úti á vegum þegar hross fælast og lenda fyrir bílaumferð.
• Nauðsynlegt er að vitja hrossanna eftir miðnættið, þegar mestu lætin eru afstaðin og ganga úr skugga um að allt sé í lagi.

Jólaleikur Landsmóts

 Ó já, jólastemningin fer að ná hámarki hér á skrifstofu Landsmóts og hér eru mandarínur og piparkökur í öll mál. Við viljum endilega hvetja ykkur til að taka þátt í jólaleiknum okkar og freista gæfunnar um leið og miði á LM 2012 er keyptur á forsöluverði.

 Veglegir vinningar bíða í pottinum en allir seldir miðar fram að jólum fara sjálfkrafa í pottinn. Athugið að á forsöluverði kostar vikupassi aðeins 10.000 krónur með LH/BÍ afslætti og N1 korts afslætti, en fullt verð er 18.000 krónur.

 Á Þorláksmessu förum við í sparifötin, fáum okkur smákökur, malt & appelsín og drögum út heppna vinningshafa. Það er til mikils að vinna því meðal vinninga eru flugmiðar til Evrópu með Icelandair, gjafabréf í Kringluna, leikhúsmiðar, inneign hjá N1, Mountain Horse úlpa frá Líflandi, hótelgisting í 2 nætur á Hilton Reykjavík Nordica og endurgreiðsla á keyptum landsmótsmiðum.

 Potturinn bíður því stútfullur af glæsilegum vinningum sem væri ekki amalegt að fá sem auka jólagjafir þetta árið. Smelltu þér á miðasöluvef landsmóts svo þú eigir möguleika á vinningi!

 Gleðileg jól!

--------------------///---------------------

DVD diskur frá LM 2011

 Já það er margt að gerast hjá Landsmóti. Á skrifstofu Landsmóts er hægt að kaupa gjafabréf fyrir miða á Landsmót sem er vitanlega tilvalið í jólapakka hestamannsins! Hafið samband í síma 514 4030 eða með tölvupósti á netfangið lh@isi.is

Að lokum minnir Landsmót á DVD diskana frá mótinu í sumar á Vindheimamelum sem nú fara að koma úr framleiðslu. Gefinn verður út annars vegar DVD með hápunktum Landsmóts og hins vegar kynbótahross á Landsmóti. Þetta er gríðarlega mikið efni, eða rúmlega átta klukkustundir í það heila og frábær heimild um gott mót norður í Skagafirði í sumar. Hápunktarnir munu kosta kr. 5.000 og kynbótadiskurinn kr. 8.000. Þarna er komin önnur hugmynd að frábærri gjöf í jólapakka hestamannsins!

 Vonast er til að hægt verði að dreifa diskunum í verslanir á föstudaginn 16.desember en einnig er hægt að panta diskinn á skrifstofu LH/Landsmóts í síma 514 4030 og fá hann sendan í póstkröfu eða greiða með kreditkorti í gegnum síma. Diskurinn verður m.a. fáanlegur í eftirtöldum verslunum: Lífland Lynghálsi og Akureyri, Baldvin & Þorvaldur Selfossi, Knapinn Borgarnesi, Skagfirðingabúð Sauðárkróki, KS Varmahlíð og Fákasport Akureyri.

Hafið endilega samband við skrifstofuna ef þið hafið einhverjar spurningar eða athugasemdir.

Með kveðju / Best regards,

Hilda Karen Garðarsdóttir
verkefnastjóri / project manager

Landssamband hestamannafélaga (LH)